Lesson 3: Kaluwasan - Ang Kasulbaran

Translated by: Ptr. Dendo C. Bongcawel

ANG KASULBARAN:

Ang Sacripisyo sa Dios ug ang Pagsapal o Pagtubos niya kanato

Ang hustisya sa Dios nangayo ug sacripisyo nga halad alang sa sala sa tawo. Si Ginoong Jesu Cristo ang nahimong halad nga sacripisyo aron pagbayad sa silot sa sala didto sa cross.

Tungod kay ang Dios balaan, matarong, ug adunay hustisya, dili siya makatugot nga ang sala magapadayon nga walay pagsilot. Tungod kay siya mahigugmaon ug maloloy-on, wala siya makagusto nga ang tanang mga tawo mahimulag gikan kaniya hangtod sa hangtod. Ang Diosnon ug balaan nga kasulbaran alang niining maong problema mao si Ginoong Jesus, ang bugtong Anak sa Dios, aron mahimong halad sacripisyo alang sa sala.

Hebreo 9:26-28 …26 kay sa ingon mag-antos unta siya sa makadaghan sukad pa sa pagbuhat sa kalibotan. Karon nga naghinapos na ang tanang panahon, nagpakita siya sa makausa ug alang sa tanang panahon aron pagwagtang sa sala pinaagi sa paghalad sa iyang kaugalingon. 27 Ang tanan kinahanglan mamatay sa makausa ug tapos niana hukman siya sa Dios. 28 Gihalad usab si Cristo sa makausa aron pagwagtang sa mga sala sa daghang mga tawo. Mopakita siya sa ikaduhang higayon dili tungod sa sala kondili sa pagluwas kanila nga naghulat kaniya.

Unsa may husto ug tinud-anay nga nahitabo didto sa cross? Pinaagi sa iyang kamatayon didto sa cross, si Jesus iyang giako ug gisapal ang silot nga kamatayon sa cross alang kanato isip bayad sa atong mga sala. Iyang gibaylo ang iyang pagkamatarong alang sa atong mga sala. Iyang giangkon ang pagkatinunglo ug iyang gihatag dinhi kanato ang iyang panalangin. Tungod sa iyang balaan ug walay sala nga pagkinabuhi, si Jesus lamang ang nakapasar o nahimong kwalipikado aron maoy magbayad sa sala sa tawo ug nahimong taytayan aron pagpasig-uli sa relasyon sa Dios ug sa tawo.

2 Corinto 5:21 Walay sala si Cristo apan gipakamakasasala sa Dios aron kita, sa atong pagkahiusa, makabaton sa pagkamatarong sa Dios.

            Galacia 3:13 Apan gilukat kita ni Cristo gikan sa tunglo sa balaod pinaagi sa paghimo sa iyang kaugalingon nga tinunglo tungod kanato kay sumala sa giingon sa kasulatan, “Tinunglo sa Dios si bisan kinsa nga bitayon sa kahoy.”